Од утре, 1-ви јули, до 31-ви август, на државните патишта се воведува забрана за сообраќај на тешки товарни возила со вкупна маса над 15 тони за време на викендите и во деновите со екстремно високи температури.
Забраната за деновите од викендот е – во петок од 17 до 22 часот, во сабота од 9 до 18 и во недела од 9 до 22 часот. Во деновите со екстремно високи температури, определени од Министерство за здравство, забраната ќе важи и од понеделник до четврток од 11 до 17 часот.
Како што соопшти АМСМ, ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.
За регулирање на сообраќајот и воспоставување на изменетиот режим, поставена е соодветна сообраќајна сигнализација.
Од утре, на патниот правец Гостивар-Охрид, стапува во сила и ограничениот режим на движење за тешки товарни возила над 7,5 тони за време на викендите, во петок од 15 до 24 часот, сабота и недела 7 до 24 часот. Овој режим ќе важи до 1-ви септември годинава.