Со голем црковно-народен собир денеска ќе биде осветен и отворен новиот црковен храм „Св. Јован Крстител“ во општина Аеродром, изграден со донација на градежната компанија Адора Инженеринг и ктиторот проф. д-р Ванчо Чифлиганец.
Осветувањето ќе го изврши поглаварот на Македонската православна црква-Охридска архиепископија, г.г. Стефан со митрополитите: брегалнички Иларион, тетовско-гостиварски Јосиф, кумановско-осоговски Јосиф, епископот Хераклејски Климент и повеќе свештеници на МПЦ, во присуство на ктиторот д-р Чифлиганец, градоначалници, претставници на државните институции, бизнис личности и голем број православни верници и граѓани на Скопје и Македонија.
Новиот храм „Св. Јован Крстител“, кој две години се градеше на атрактивна локација, во паркот со авион во општина Аеродром, на Кејот на реката Вардар, е петкуполна црква со специфична, древна архитектура, а во комплексот има камбанарија, фонтана и парк.
Свеченото отворање на црковниот храм „Св. Јован Крстител“ во општина Аеродром, ќе биде збогатено со културно уметничка програма со настапи на познати имиња од црковната, народната и забавната музика.