Турската Влада смени над 2.500 судии, обвинители и административни службеници во судовите во различни делови на земјата, пишува турскиот весник на англиски јазик „Хуриет дејли њуз“.
Високиот совет на судиите и обвинителите издаде доцна синоќа наредба за смена на 2.224 магистрати и 293 административни службеници.
Назначени се нови заменици-главни обвинителите на Анкара и Истанбул. Разрешени се главните обвинители во повеќе окрузи, меѓу кои Балкесир, Бурса, Чанаккале, Елјазог, Ерзинџан, Ескишехир, Хатај, Трабзон и Ван.
Наредбата за смена на магистратите се разгледува како најсериозниот удар на Владата врз „паралелната држава“, како што ја нарекува заедницата на исламскиот проповедник Фејтулах Ѓулен, кој има влијание врз полицијата и правосудството.