Српската амбасадорка Душанка Дивљак-Томиќ денеска за време на престојот во Битола искажа јавна благодарност до граѓаните и институциите во Македонија што учествуваа во хуманитарните акции за настраданото население од поплавените подрачја во Србија.
– Хуманитарната акција во Македонија претставува гест на исклучително и големо пријателство, внимание и висока чувствителност за луѓето што настрадаа и на коишто помошта им беше најпотребна, истакна амбасадорката Дивљак-Томиќ, додавајќи дека Србија никогаш понудената помош нема да ја заборави.
Српската амбасадорка во Битола учествуваше на промоцијата на Зборникот трудови на тема „Конзулска Битола и историските, современите и идните културни и уметнички врски меѓу Република Македонија и Република Србија“ кој, како што рече, претставува потврда за големата културна ризница и квалитет на соработката меѓу двете држави.