Премиерот Никола Груевски попладнево ги посети повредените лица од железничката несреќа на патот Штип-Велес, кај Сарамзалино, кои беа хоспитализирани на комплексот клиники „Мајка Тереза“ во Скопје.
Директорите на клиниките за ТОАРУ (трауматологија, ортопедски болести, анестезија, реанимација и интензивно лекување и Ургентен центар и на Клиниката за неврохирургија Реџеп Селмани и Александар Чапаровски го информираа премиерот дека повредените се во стабилна состојба.
Од хоспитализираните 10 лица на клиниките во Скопје, по укажаната помош, тројца се пуштени на домашно лекување. – Тројца се примени на Клиниката за анестезија, реанимација и интензивно лекување (КАРИЛ), а од нив една пациентка е на респиратор, со контузии на белите дробови, со посериозна, но во секој случај стабилна состојба и вон животна опасност, изјави директорот Селмани.
На Клиниката за трауматологија, додаде, се лекуваат тројца од повредените, а на еден му е извршена успешна хируршка интервенција и е во стабилна здравствена состојба. Еден пациент кој е хоспитализиран на Клиниката за неврохирургија, според директорот Чапаровски, е во стабилна состојба.
– Пациентот на неврохирургија е во стабилна состојба, има скршеници на базата на черепот, свесен е и контактибилен, следиме се што треба и е во добра состојба, изјави Чапаровски.
Повредените од несреќата ги посети и министерот за здравство Никола Тодоров, кој претходно со министерот за транспорт Миле Јанакиески, беа на местото на несреќата, како и кај другите повредени кои се на лекување во болниците во Штип и во Велес.
Несреќата се случи изутрината по 7 часот меѓу шинобус-воз и автобус на „Струмица експрес“ во близина на бензинската „Мики петрол“ на патот Штип-Велес.