Група средношколци од Дојран заедно со заинтересираното локално население денеска го одбележаа Светскиот ден на птиците преселници преку туристичка прошетка покрај езерото со цел да ги набљудуваат птиците и да научат нешто повеќе за нивното значење.
Оваа година темата на светската прослава е „Птиците преселници и туризмот“ која ги истакнува врските меѓу заштитата на птиците преселници и развојот на локалниот еко туризам.
– Дојран е препознаен како клучно подрачје за биолошка разновидност и спектакуларните движења на птиците преселници во иднина можат да привлечат туристи од земјата и странство. Оваа општина има голем потенцијал за развој на еко туризам кој ќе вклучува набљудување и фотографирање на птици, активности што ќе бидат корисни за дивиот свет, локалното население и туристите, изјави Ксенија Путилин, асистент на проектот за едукација и градење капацитети за одржливост на Дојранското езеро.
Прославата на Светскиот ден на птиците преселници во Дојран ја организира македонското еколошко друштво во соработка со општината Дојран.