Мирен изборен ден не е стандард за европска земја каква што е и Македонија. Македонија е членка на Советот на Европа и како членка на ОБСЕ има преземено обврски да обезбедува основни слободи и права, вклучувајќи го и избирачкото право, вели холандската амбасадорка Мариет Схурман во неделното интервју на Радио Слободна Европа.
Мислам дека различните оценки се конзистентни. Нерамноправен терен во предизборната трка, но во основа мирен изборен ден. Можеби треба да се објасни дека имаше различни видови на набљудувачи, а набљудувачите од Парламентарното собрание на ОБСЕ и од Советот на Европа беа тука само за вториот круг од изборите, така што неизбежно нивните оценки се полимитирани од оценките на ОДИХР кои го покриваат целиот период, целиот изборен циклус.
Мојата втора напомена би била дека во основа мирен изборен ден не е стандард за европска земја каква што е и Македонија. Македонија е членка на Советот на Европа и како членка на ОБСЕ има преземено обврски да обезбедува основни слободи и права, вклучувајќи го и избирачкото право и извештајот на ОДИХР е многу јасен во кои обврски и меѓународни стандарди Македонија сè уште заостанува и не ги исполнува своите обврски.
