Целокупната постапка на верификација на мандатите на пратениците на денешната конститутивна седница на новиот состав на Собранието на Република Македонија, е во согласност со Уставот, законите и Деловникот на Собранието, наведува ВМРО-ДПМНЕ во пишаната реакција на денешната изјава на Рената Дескоска од СДСМ.
– Мандатите на пратениците го даваат граѓаните на Македонија, а на Собранието му е уставна обврска тоа да го верификува. Доколку избраните пратеници од СДСМ и нивните коалициони партнери сакаат да си поднесат оставки од пратеничките функции, никој не им пречи тоа да го направат согласно Уставот, законите и Деловникот, се вели во реакцијата.
ВМРО-ДПМНЕ го повикува СДСМ на рационалност и одговорно однесување.
– Потребно е да престанат да се однесуваат како мали деца, да внесат разум во својата работа и политичко делување и да ја прифатат одговорноста кои сами ја бараа на изборите и ја добија од граѓаните на Република Македонија. Се друго е неодговорно и несериозно однесување, стои во реакцијата на ВМРО-ДПМНЕ.