Рускиот заменик-премиер Дмитриј Рогозин, кој беше во посета на молдавскиот сепаратистички регион Придњестровје, на својот профил на Твитер објави дека Романија и Украина не му дозволиле прелет над своите територии на неговиот авион, но дека тој сепак ќе полета од аеродромот во Кишињев.
– Полетуваме и покрај забраната, напиша Рогозин, при тоа детално опишувајќи ја состојбата.
Како што јави ИТАР-ТАСС, Рогозин престојуваше во Тираспољ, „главниот град“ на Придњестровје, каде вчера присуствуваше на парадата по повод Денот на победата над фашизмот.
– По барање на САД, Романија ми го затвори својот воздушен простор, а и Украина не ме пушта, наведе Рогозин на Твитер.
Украина не му дозволи прелет на авионот на Рогозин ниту пред два дена кога патуваше кон Кишињев, па леталото кружеше преку Бугарија и Романија.
– Добро е што Украина не е (голема колку) Русија, зашто ќе требаше да ја заобиколуваме 20 часа. Вака ја заобиколивме за 4,5 часа, напиша тогаш Рогозин на Твитер.