Во Спомен-домот на браќата Миладиновци во Струга денеска беше промовирана книгата раскази „Молчаливи хоризонти“ од бугарскиот автор Георги Балабанов.
Тој е член на Сојузот на независните бугарски писатели и е автор на пет книги.
Промоцијата на „Молчаливи хоризонти“ ја организираа Здружението „Бран“ и ревијата „Бранувања“ од Струга, во рамки на програмата за меѓународна соработка.
– Во оваа книга, во секој ред на расказите зачукува и пулсира нашата совест.
Толку е разнолика и толку ни е блиска. Совест, што ја става на вага димензијата на нашите дела. Мислам дека секој читател ќе ги пронајде своите хоризонти на соништата, патувајќи кон светлината со магијата на говорот, истакна Балабанов.
Промоторот и рецензент Петко Шипинкароски рече дека „Молчаливи хоризонти“ има 22 раскази и исто толку судбини раскажани со јасни и течни реченици.
– Авторот ја започнува книгата со расказот „Гајдаџијата“, а ја завршува со расказот „Селидбата“. Би рекле, животна драма што е толку присутна на овие балкански простори. Со мошне јасен и едноставен говор, со уметничко развлечување и локација, Балабанов ја дава голготата на луѓето, истакна писателот Шипинкароски.