Европскиот комесар за проширување Штефан Филе ја демантираше изјавата на претседателот на Европскиот парламент Мартин Шулц дека Европската Унија бара од Србија признавање на Косово и нагласи дека услов е нормализаиција на односите, а не признавање.
„Ние и денеска повторивме дека шефовите на држави во декември донесоа заклучоци во кои јасно се говори за видлив и одржлив развој во односите со Косово. Тоа се однесува на нормализација, а не на потребата од признавање. Тој мандат е премногу јасен и нема планови надвор од тоа“, нагласи Филе.
На изјавата на Шулц реагираше и премиерот на Србија, Ивица Дачиќ кој кажа дека признавањето на Косово не е услов и дека таков ултиматум тој не слушнал од Шулц.
„Ништо не е променето, ни во ставот на Србија ниту во ставот на ЕУ. Нема никакви нови услови за пристапувањето на Србија кон ЕУ. Србија нема да ја прифати еднострано прогласената независност“, рече Дачиќ.