Нема чесни и фер избори со пристрасна медиумска покриеност, матни државни и партиски активности што не овозможија рамноправен натпревар на кандидатите на изборите. Сегашните владини политики, ги загрозуваат демократските стандарди, како и меѓуетничките односи, кои се влошени во секој аспект, вели во интервју за Фактор, поранешниот евроамбасадор во Република Македонија Ерван Фуере.
Фуере во интервјуто вели дека независно дали владејачката партија на изборите ќе освои помалку или повеќе од 62 пратеника, конфронтирачката и негативна политичка атмосфера во државата мора најитно да се надмине, да запре.
-Ова мора да биде најважен приоритет на идната Влада. Слично, застрашувачките тактики кои систематично се користат од владејачката партија кон оние кои ја критикуваат и создавањето на континуирана атмосфера на заплашувања и уцени во целото општество треба да се заборави – вели Фуере за Фактор.
Во интервјуто Фуере потенцира дека сите оценки на меѓународната заедница, вклучувајќи ги и најновите извештаии на Стејт Департементот на САД, се едногласни во посочување на негативните последици на сегашните владини политики, што ги загрозуваат демократските стандарди, како и меѓуетничките односи, кои се влошени во секој аспект.
-Бојкотот на изборите нема да има никава цел. Тоа ќе биде навреда за граѓаните, доколку ова демократско право на слободно изјаснување не им е дозволено – вели Фуере, запрашан како го оценува бојкот на ДУИ на претседателските избори.
За спорот со името и влезот на државата во ЕУ, екс амбасадорот на Унијата вели:
-Тврдењето на македонската Влада дека спорот со името е единствената пречка на државата за влез во ЕУ за жал не ја отсликува реалност. Постојат сериозни и длабоко вкоренети проблеми во Македонија што потекнуваат од авторитативните владини методи и нејзината популистичката агенда.