Велешката полиција поднесе кривична пријава против машиновозачот Р.А. (50 год) од Скопје, за „загрозување на безбедноста во сообраќајот“.
Полицијата го осомничи дека е виновен за железничката сообраќајна несреќа која се случи на станицата „Рајко Жинзифов“, на 15 декември лани, со образложение дека не се придржувал кон прописите за безбедност на железничкиот сообраќај.
Истрагата покажала дека тој минал на излезниот сигнал иако тој покажувал знак стоп, по што удрил во товарен воз. Од ударот од шините излетала една локомотива и три вагони, а полесно се повредени две лица. По оваа несреќа, железничкиот сообраќај од Скопје кон Гевгелија, Битола, Кочани и товарниот сообраќај кон и од Грција и Србија беше во прекин 24 часа.