Манчестер Јунајтед го отпушти 45-годишниот менаџер Мајкл Керик по разочарувачкиот почеток на сезоната и низата лоши резултати во Премиер лигата.
Клубот ја потврди разделбата со англискиот стручњак, а како негов најверојатен наследник се споменува Маурисио Покетино (54), актуелниот селектор на националниот тим на Соединетите Американски Држави.
Керик минатото лето потпиша двегодишен договор вреден околу пет милиони фунти (5,9 милиони евра) годишно. Сепак, Јунајтед вклучи посебна клаузула во договорот која овозможува прекин на соработката со значително помало обештетување.
Според англиските медиуми, клубот ќе треба да ја исплати на Керик само преостанатата плата до крајот на првата сезона. Бидејќи до крајот на сезоната остануваат уште седум месеци, отпремнината би требало да изнесува околу 2,9 милиони фунти, односно 3,4 милиони евра.
Трошоците за Манчестер Јунајтед не завршуваат тука.
Клубот ќе мора да плати и обештетување за Покетино, кој неодамна го продолжи договорот со Фудбалската федерација на САД до крајот на Светското првенство во 2030 година.
Клаузулата за откуп на аргентинскиот стручњак изнесува 10 милиони долари, или приближно девет милиони евра.
Кога ќе се соберат отпремнината за Керик и обештетувањето за Покетино, Манчестер Јунајтед ќе треба да издвои околу 12,4 милиони евра за промена на тренерската позиција.
Во таа сума не е вклучена платата што аргентинскиот стручњак ќе ја добива на „Олд Трафорд“.