Француското Министерство за внатрешни работи денеска соопшти дека во саботата, за време на протестите и прославите за Ноќта на вештерките, низ целата земја биле уапсени 779 лица.
Шефот на париската полиција, Патрис Фор, денеска им се заблагодари на припадниците на безбедносните сили за, како што наведе во објава на платформата „Икс“ (X), нивното „примерно однесување“ за време на вчерашните протести.
Тој нагласи дека на железничките станици во Париз и неговите предградија биле спроведени голем број превентивни контроли, што „овозможило да се спречат поединци, кои имале намера да го нарушат јавниот ред и мир, да се приклучат на протестниот марш“.
„Неприфатливото насилство, предизвикано од мали групи провокатори кон крајот на маршот, за жал, резултираше со повреди кај полицајците и жандармите“, напиша тој.
Според телевизијата БФМ (BFM), денот на мобилизација на 31 октомври поминал главно мирно низ цела Франција, и покрај неколкуте судири меѓу безбедносните сили и насилните поединци.
Според податоците на коалицијата на младински синдикати, во вчерашната мобилизација учествувале речиси половина милион луѓе, додека Министерството за внатрешни работи проценува дека бројката изнесува 320.000.