Економскиот развој, подобриот животен стандард и создавањето услови за младите да останат и да ја градат својата иднина во Македонија мора да се темелат на знаење, наука и одговорно користење на природните ресурси. Во време кога минералните суровини стануваат сè поважни за европската и светската економија, нашата земја треба да го искористи својот потенцијал преку стручни анализи, современи технологии и високи стандарди за заштита на животната средина.
Од иницијативата „И Здравје и Работа“ посочуваат дека науката и експертизата треба да бидат основа за носење одлуки поврзани со рударството и искористувањето на минералните ресурси. Македонија располага со значајни наоѓалишта, меѓу кои и бакарното наоѓалиште „Иловица–Штука“, чиј потенцијал треба да се разгледува низ призма на економскиот развој, интересот на граѓаните и примената на современи еколошки стандарди.
„Неопходно е да престанеме да ги гледаме природните ресурси само како неискористен потенцијал. Тие треба да бидат ставени во функција на подобар живот за граѓаните, нови работни места, повисоки приходи и создавање перспективи за младите генерации. Науката треба да го покажува патот, а институциите да обезбедат законска сигурност, контрола и одговорно управување“, посочуваат од „И Здравје и Работа“.
Одговорното развивање на рударските проекти може да придонесе за отворање директни и индиректни работни места, развој на локалните бизниси, зголемување на извозот и подобрување на јавните приходи. Овие економски ефекти се особено значајни во услови кога земјата се соочува со демографски предизвици и иселување на младото население.
„Белата чума“ не може да се спречи со една мерка или со декларативни политики. Потребни се стабилна економија, добро платени работни места, развиена инфраструктура, квалитетно образование и сигурна иднина за семејствата. Инвестициите во стратешки индустрии, вклучително и современото рударство, можат да бидат дел од поширока економска политика насочена кон создавање услови младите да останат во своите места и да ја планираат иднината во сопствената земја.
Од иницијативата повикуваат на отворена и стручна дискусија за иднината на минералните ресурси во Македонија, со вклучување на научната заедница, институциите, локалните заедници и економските чинители.
Минералните ресурси не треба да останат неискористен потенцијал. Со знаење, современа технологија и одговорно управување, тие можат да придонесат за економски развој, подобар животен стандард и создавање иднина во која младите ќе имаат причина да останат и да живеат во Македонија.