Како што се приближува одлуката за добитникот на „Златната топка“ (Ballon d’Or), сè повеќе се зборува за тоа кој покажал најмногу во текот на годината.
Меѓу фудбалерите кои се во центарот на вниманието секако се две големи ѕвезди на шпанскиот фудбал – Ламин Јамал од Барселона и Килијан Мбапе од Реал Мадрид.
Токму Јамал отворено зборуваше за трката за ова престижно индивидуално признание во интервју за емисијата „Universo Valdano“ на каналот „Movistar“, кое е најавено за следниот петок.
Младиот ас на Барселона не се обиде да ги скрие своите амбиции и јасно стави до знаење дека себеси се гледа како главен кандидат за наградата.
– На кого би му ја доделил „Златната топка“? Искрено мислам дека можеби постојат само двајца играчи кои се најдобри во светот, но јас ја заслужувам оваа година – рече Јамал.
Потоа тој откри кој, според него, е единствениот фудбалер што може да му парира во моментов.
– За мене, јас и Килијан Мбапе сме двајцата најдобри играчи, а тоа го знае секој што ги гледа натпреварите – изјави играчот на Барселона.
Интересно е што само неколку дена претходно и Мбапе зборуваше за „Златната топка“.
Французинот смета дека треба да се направи појасна разлика помеѓу индивидуалниот учинок на фудбалерот и резултатите што ги постигнал неговиот тим.
– Секогаш сум верувал дека „Златната топка“ треба да награди поинаков тип на играч. Секако, постои и колективен аспект, кој е важен бидејќи фудбалот е тимски спорт. Но, ова е индивидуална награда – рече Мбапе.
Напаѓачот на Реал Мадрид потоа нагласи дека верува оти направил доволно за да се најде на самиот врв на листата на кандидати.
– Мислам дека оваа година понудив нешто поинакво. Затоа сметам дека можам да ја освојам „Златната топка“ – заклучи Французинот.
На тој начин, двете најголеми ѕвезди на Барселона и Реал Мадрид практично јавно ја истакнаа својата кандидатура за најпрестижната индивидуална награда во светот на фудбалот, што дополнително ја вжештува атмосферата пред конечната одлука.