Државјанка на Србија се здоби со повреди вчера попладне додека возеше џет-ски во водите кај Гларокавос, во општина Касандра, на Халкидики.
Триесет и шестгодишната жена претрпе повреда на главата откако падна во морето за време на возењето и изгуби свест, пишува „Катимерини“.
Прва помош ѝ пружиле нејзиниот сопруг и одговорното лице од објектот за изнајмување опрема за водени спортови, по што таа со брза помош беше пренесена во Здравствениот центар во Касандра, потоа во Општата болница на Халкидики, а оттаму во Општата болница „Папаниколау“ во Солун, каде што е задржана на испитување.
Второто пристанишно одделение во Неа Мудања при Централната пристанишна управа на Солун, кое спроведува прелиминарна истрага, го уапси 53-годишниот управител на компанијата поради прекршување на членовите 306 од Кривичниот законик (што се однесува на изложување на опасност) и 314 (што се однесува на телесна повреда од небрежност).
Тој е уапсен бидејќи ѝ изнајмил џет-ски на 36-годишната жена иако таа немаше соодветна дозвола за управување со пловилото.