Фудбалерите на Реал Мадрид синоќа славеа со 2:1 на гостувањето кај Еспањол во натпреварот од 1. коло на шпанското првенство, што воедно беше и камбек натпревар за Жозе Мурињо на клупата на мадридскиот тим. Реал имаше водство обезбедено со голот на Џуд Белингем, а по израмнувачкиот погодок на Алекс Калатрава, Карлос Еспи ја донесе победата во 90. минута.
Португалскиот стручњак се појави на прес-конференција по натпреварот. На неа го истакна херојот на дуелот, но зборуваше и за Винисиус Жуниор и неговите конфронтации со противничките играчи.
„Мислам дека заслуживме да победиме, но Еспањол не заслужи да загуби. Во второто полувреме имавме одлична контрола и многу добар пресинг, презедовме многу ризици. Заслуживме победа. Но, за тим што игра како Еспањол, што се брани и напаѓа од контранапади на тој начин, со играчи кои играат на границата на своите можности и со добра организација, тешко е да се вратат дома со празни раце“, рече Мурињо за натпреварот и додаде:
„Кога станува збор за начинот на вршење притисок што го претпочитам, нам ни недостасуваат минути и истрчани километри. Затоа многу ја ценам оваа победа. Ова е победа со душа, вклучително и од страна на оние на клупата. Фрустрираната клупа не помага во ништо, но клупата што го чувствува тимот помага да се дојде до победа. Беше тежок натпревар и ова се три многу важни бода.“
„Кога зборуваме за најдобрите во светот, Реал има многу играчи во таа група. Белингем, Винисиус, Мбапе… Тие навистина се таму. Се двоумев дали да го ставам Џуд во почетниот состав или да го внесам подоцна. Не знам дали донесов правилна одлука, но тој е физички и ментално многу силен. Очекувам тој да се поврзе со напаѓачите. Тој има чувство за гол и мора да игра блиску до голот. Може да игра и повлечено, но тогаш ја губиме неговата близина до голот. Ми се допаѓа Џуд кој, кога е во врвна физичка форма, создава такви можности. И Феде Валверде може повеќе да навлегува во таа зона, но кога игра со Бернардо, мора да биде повнимателен и тука малку губиме. Сè уште се запознаваме меѓусебно, но го правиме тоа без да губиме бодови. Тоа е најважното нешто“ рече Португалецот.
„Постои ризик да се навратите со месеци наназад и да ги извадите од контекст моите зборови од времето кога му бев противник на Вини. Но, сега Вини е мој играч. Тој не е светец, но она што му го прават е премногу. Уште од првата минута изгледа како да постои однапред смислено сценарио. Сега јас ќе го удрам, па ти, еден добива жолт картон, а потоа влегува друг кој не добива… Тоа е голема фрустрација за него и тој мора да има голема ментална контрола. Дури и му реков дека, ако постигне гол, треба да внимава како слави. Живееме во време на борба против малтретирањето, но кога станува збор за Вини, сè уште сме во време на малтретирање“ – порача Мурињо.