Повеќе од 2.000 луѓе беа евакуирани од своите домови во Германија откако шумски пожар во близина на белгиската граница се прошири на едно село, соопштија локалните власти.
На жителите на селото Геј им беше наредено да ги напуштат своите домови околу 4 часот наутро и да се упатат кон центар за помош поставен во основно училиште во блиското село, се вели во соопштението.
Тие беа повикани да ги земат само најнеопходните предмети, лични документи и неопходни лекови со себе.
„Овој шумски пожар се заканува силно да ја погоди локалната заедница“, објави Мона Нојбар, заменик-премиерка на Северна Рајна-Вестфалија, на социјалните мрежи.
Градоначалникот на Хиртгенвалд, Стефан Кранен, изјави за Ројтерс дека евакуацијата е завршена, но ситуацијата останува критична, а пламените јазици се приближуваат на 300 метри од селото, објави регионалниот јавен радиодифузер WDR.
Кранен рече дека еден од пожарите што сè уште е надвор од контрола се проширил преку ноќ на поранешно складиште за муниција во блискиот град Дирен.
Делови од околната шума сè уште се покриени со неексплодирана муниција од Втората светска војна, бидејќи ридестиот терен го оневозможил целосното расчистување на областа. Пожарникарите соопштија дека за време на пожарот се слушнале повремени експлозии.
Пожарот изгорел околу 300 хектари, а два тенкови на германската армија им помагаат на пожарникарите со расчистување на пристапните патишта низ тешко достапните делови од шумата.