Големиот шумски пожар што избувна вчера попладне на грчкиот остров Парос и натаму е надвор од контрола, а утрово грчките власти распоредија дополнителни копнени и воздушни сили во обид да го локализираат огнот, јавува грчката новинска агенција АНА.
Властите стравуваат дека засилениот ветер може дополнително да го отежне гаснењето и да придонесе за ширење на пожарот. Досега се евакуирани девет населени места, откако преку системот за итни предупредувања „112“ беа испратени четири последователни известувања.
🔥⚠️Πύρινη κόλαση στην #Πάρο. Η #πυρκαγιά καίει ανεξέλεγκτη αυτή την ώρα. Κατά διαστήματα ενισχύονται και οι άνεμοι που φτάνουν τοπικά τα τέσσερα με πέντε μποφόρ.
Βίντεο : Giorgos Rigopoulos#Φωτιά #Πάρος
Πηγή: Forecast Weather Greece pic.twitter.com/1TYnR2JbA3— Penny Rage (@penny_rage) July 29, 2026
Утрово жителите на Трипити, Глифа, Пиргаки и Аспро Хори добија наредба да се евакуираат кон Дриос, додека претходно беше издадена и наредба за евакуација на жителите на Агкаирија кон плажата Алики.
Во текот на вчерашниот ден беа евакуирани и населените места Агиос Хараламбос, Кампи, Бугадос, Анераца и Камари.
Во гаснењето на пожарот учествуваат 66 пожарникари, четири специјализирани единици за шумски пожари од областа Атика и 16 противпожарни возила. Од утрово во акцијата повторно се вклучени и два противпожарни авиони „Канадер“ и пет хеликоптери.
Во интервенцијата помагаат и доброволци, како и локални служби од Парос со цистерни за вода и тешка механизација, додека целата операција ја координира заменик-командантот на грчката противпожарна служба.
Во текот на денот се очекува дополнително засилување на копнените сили, при што од пристаништето Рафина со траект треба да пристигнат уште 20 пожарникари и осум противпожарни возила.
Според грчката карта за проценка на ризик од пожари, Парос денеска е во трет степен на опасност, што претставува високо ниво на ризик, поради што властите остануваат во состојба на зголемена готовност додека пожарот не биде ставен под контрола.