Британскиот тешкаш Ентони Џошуа ја оствари една од најдраматичните победи во својата кариера. Откако во првата рунда се најде на работ на сензационален пораз и двапати заврши на подот, 36-годишниот боксер во втората рунда успеа со нокаут да го совлада албанскиот борец Кристијан Пренга на боксерската приредба во саудиска Џеда.
За Џошуа ова беше прв настап по трагичната сообраќајна несреќа во Нигерија во декември минатата година, во која загинаа неговите блиски пријатели Сина Гами и Латиф „Лац“ Ајоделе.
Во нивна чест, на градите ги носеше нивните имиња, додека на подот на рингот беа испишани нивните имиња со пораката „My Brother’s Keeper“.
Повратничката борба започна со најлошото можно сценарио. Веќе по 20 секунди од мечот, аутсајдерот Пренга го погоди Џошуа со силен десен аперкат и го испрати во нокдаун. Иако Британецот стана со насмевка, Пренга, кој во борбата влезе со 20 нокаути од исто толку победи, повторно го потресе и со лев аперкат вторпат го собори на подот.
Highlights of Anthony Joshua's epic comeback victory against Kristian Prenga in Jeddah 😤#JoshuaPrenga | Exclusively on DAZN 🥊 pic.twitter.com/T6bq3x0tUF
— Ring Magazine (@ringmagazine) July 25, 2026
Изгледаше дека се подготвува едно од најголемите изненадувања во историјата на тешката категорија и дека долгоочекуваната борба против Тајсон Фјури ќе пропадне.
Сепак, во втората рунда Пренга неочекувано го намали темпото и се повлече наназад, што поранешниот светски шампион знаеше да го искористи. Го намами противникот да тргне во напад, а потоа пласираше разорен десен кроше кој го испрати 35-годишниот Албанец на подот, по што судијата ја прекина борбата и му ја донесе на Џошуа 30. победа во кариерата, од кои 27 со нокаут.
„Ова е повеќе од сила на ударот. Ова беше духот, ова беа Лац и Сина, и нивните семејства. Ме боли воопшто да зборувам за тоа… Тоа се моите браќа“, изјави емотивниот Џошуа по мечот, едвај задржувајќи ги солзите.
Со оваа победа официјално е отворен патот за мегаборбата против Тајсон Фјури. Договорите меѓу двајцата најдобри британски тешкаши веќе се потпишани, а мечот е планиран за ноември.
Фјури, кој само 24 часа претходно во Тајланд го победи 46-годишниот Мариуш Вах, не се појави во Џеда, иако многумина шпекулираа дека ќе присуствува.
Иако британските навивачи посакуваат спектаклот да се одржи во Обединетото Кралство, се очекува борбата да ја пренесува Netflix, додека саудиските организатори и телевизиски партнери преферираат таа да се одржи во Соединетите Американски Држави поради американската публика.
Промоторот Еди Херн изјави дека сите детали околу договорот се веќе усогласени, но нагласи дека оваа вечер му припаѓа на Џошуа и на неговата неверојатна сила да се врати во рингот по тешките животни удари што ги преживеал во изминатите седум месеци.