Звучи неверојатно, но веројатно е вистинито – Лионел Меси потекнува од Бразил.
Додека фудбалскиот свет сè уште ги собира впечатоците по бурното Светско првенство, вниманието на јавноста во јужноамериканските и европските медиуми го привлече една необична и интригантна вест за потеклото на еден од најголемите фудбалери на сите времиња.
Според истражувањето на италијанскиот историчар и генеалог – Фјоренцо Сантини, кој го проучува семејното стебло на Лионел Меси уште од неговите фудбалски почетоци во Барселона, славниот Аргентинец наводно има и бразилски корени.
Иако веста звучи како сензација од рубриката „верувале или не“, истражувањето открива фасцинантна семејна миграција што ги поврзува Италија, Бразил и Аргентина.
Одамна е познато дека Лионел Меси потекнува од Апенините. Неговиот прадедо по таткова линија, Анџело Меси, е роден во градот Сан Северино Марке во италијанската провинција Марке, од каде што во 1893 година се преселил со сопругата во Росарио, Аргентина.
Кога оваа врска беше официјално потврдена, градските власти на Сан Северино Марке го прогласија Меси за почесен граѓанин.
Сепак, подлабокото истражување на мајчината линија откри дека прадедото од таа линија, Раниеро Кучетини, е роден во истата италијанска провинција. Интересно е што се смета дека предците на тренерот Лионел Скалони, кошаркарската легенда Ману Џинобили, па дури и на актуелниот претседател на Аргентина, Хавиер Милеи, потекнуваат од истиот географски регион во Италија.
Вистинската мистерија и наводната „бразилска трага“ започнуваат во 1899 година. Според историските документи до кои дојде Сантини, Раниеро заминал во Бразил со сопругата Рома Рикез и двете деца, каде што се вработил на една од плантажите во сојузната држава Сао Паоло.
По пристигнувањето во бразилското пристаниште, се случила бирократска грешка што го променила текот на историјата на ова семејство: поради јазичните бариери и фонетските тешкотии, името и презимето биле запишани поинаку, па така Раниеро станал Рамиеро Кончентини (а всушност бил Кучетини).
Семејството набрзо се преселило во внатрешноста на сојузната држава Сао Паоло, во градот Рибеирао Прето, каде што се родиле нивните деца Ермини (1900) и Ардериго (1904).
Токму преку Ардериго дошло до нова промена на презимето, па новороденчето било заведено како Федерико Кучитини (во оригиналот било Кучетини).
Сепак, бразилската епизода била краткотрајна. Една година по раѓањето на „бразилскиот“ Федерико, семејството ги спакувало куферите и пристигнало во Аргентина на 27 септември 1905 година, населувајќи се во Росарио. Подоцна во тој град се родиле дедото на Меси, Антонио Кучитини, неговата мајка Селија Марија Кучитини и, конечно, самиот Лионел Андрес Меси Кучитини – што е и целото име на Меси.
Иако руските и некои јужноамерикански извори нашироко известуваат за овие генеалошки детали како за интересна потврда на глобалните миграции од крајот на 19-тиот и почетокот на 20-тиот век, официјална потврда од самото семејство Меси сè уште нема. Сепак, доколку овие наводи се покажат како целосно точни, излегува дека пред да станат гордост на Аргентина, дел од предците на Меси накратко го носеле бразилскиот печат.
Неговиот прадедо е роден таму, па така Бразил – дури и да немаше со кого да се гордее во фудбалот, а камоли вака како што стојат работите – сигурно би можел да го „присвои“ и Лео. Би имал (барем малку) право на тоа.
Но, се знае чија легенда беше и остана тој. Аргентинската фудбалска репрезентација добро го знае тоа.