Најдобрата приказна на овогодишниот Вимблдон ја испиша домашниот натпреварувач Артур Фери, кој како 114-ти играч во светот стигна до полуфиналето.
Британецот го совлада Италијанецот Флавио Коболи во три сета – 6:4, 7:6 и 6:0, за два часа и 15 минути.
THE FERY TALE CONTINUES 👏
Local kid Arthur Fery takes down No. 9 Flavio Cobolli in straight sets to advance to the semifinals at Wimbledon 🇬🇧 pic.twitter.com/xB90Loah4S
— SportsCenter (@SportsCenter) July 8, 2026
Колку голем успех е ова за Фери и за самиот британски тенис, најдобро сведочи фактот дека тој правото за настап во Лондон го доби дури по специјална покана од организаторите, а останатото, како што велат, е историја.
Во четвртфиналето тој го елиминираше финалистот на неодамнешниот Ролан Гарос, фаворизираниот Флавио Коболи, и тоа многу убедливо, во три сета. Патем, Британците неговата приказна ја нарекоа „Ferytale“ (игра на зборови со неговото презиме и зборот „бајка“), што е сосема логично, бидејќи овој 23-годишен тенисер моментално живее вистинска спортска бајка.
Неговиот претходен најдобар резултат на Грен слем турнирите беше второто коло на Австралија опен (2026) и второто коло на Вимблдон (2025).
Фери го доби првиот сет против Италијанецот со 6:4, во вториот беше подобар во тај-брејкот со 7:4 – што, како што се покажа, го скрши борбениот дух на противникот – а во последниот сет го декласираше Коболи со 6:0.
Подвигот што го направи е речиси на исто ниво со оној што Горан Иванишевиќ го постигна уште во 2001 година, кога стана шампион на Вимблдон како 125-ти тенисер во светот, настапувајќи со „вајлд-карта“.
Фери ќе игра во полуфиналето против шампионот од Ролан Гарос, Александар Зверев.
Германецот буквално во исто време го заврши својот меч против Тејлор Фриц, исто така славејќи многу лесно – 6:4, 6:4, 6:2.