Поради инцидентот помеѓу Орелиен Чуамени и Федерико Валверде, Реал Мадрид покрена вонредна дисциплинска постапка што може да резултира со сериозни последици за двајцата фудбалери, вклучително и суспензии до 20 натпревари и раскинување на договорите.
Постапката беше отворена и покрај фактот што Уругваецот Валверде во изјава негираше дека воопшто се случил конфликтот.
Според колективниот договор на Ла Лига и синдикатот на играчи (АФЕ) и внатрешните прописи на клубот, можните санкции зависат од сериозноста на прекршокот. Доколку инцидентот се прогласи за сериозен, казната е помеѓу три и десет натпревари суспензија. Во случај да се окарактеризира како многу сериозен, играчите се соочуваат со суспензија од 11 до 20 натпревари.
Како најстрога мерка за многу сериозен прекршок, предвидена е можност за раскинување на договорот.
Покрај суспензијата, што вклучува и задржување на плата, клубот може да изрече дополнителна казна.
Самиот факт дека клубот покренал вонредна постапка укажува дека ситуацијата ја смета за исклучително сериозна. Како дел од постапката, клубот ќе назначи истражител, а играчите ќе добијат обвинение и можност да се бранат. Се очекува целиот процес да трае неколку недели. Засега не е познато дали можните дисциплински мерки ќе важат за тековната сезона или ќе стапат на сила дури од следната сезона.
Конфликтот меѓу Аурелиен Чуамени и Федерико Валверде започнал со расправија, а завршил со тепачка по тренинг сесија обележана со голема тензија. Како што е наведено во шпанските медиуми, по нападот на Чуамени, Уругваецот ја удрил главата при паѓање.
Тој добил посекотина и ја изгубил свеста. Потоа бил однесен во болница.
Поради трауматска повреда на главата, како што објави клубот, Валверде ќе биде „во мирување помеѓу 10 и 14 дена“.