Партијата Левица објави дека претседателот на нејзиниот подмладок „Црвена младина“, Андреј Куцуловски, e приведен за време на ракометниот натпревар меѓу Македонија и Израел, при што, според нив, причина било истакнување на знаме на Палестина.
Во објава на социјалните мрежи, од партијата наведуваат дека приведувањето било извршено без образложение, без наведување на конкретен прекршок или кривично дело, како и без легитимирање на полициските службеници.
„Тој беше оттурнат и со лисици однесен во полициска станица, како да станува збор за високоризичен криминалец“, стои во реакцијата на Левица.
Од партијата упатија критики до Панче Тошковски и институциите, тврдејќи дека полицијата демонстрира сила врз млади лица кои, според нив, не сториле прекршок, додека „вистинските криминалци“ остануваат неказнети.
Левица најави дека ќе ги искористи сите правни и институционални механизми за, како што наведуваат, расчистување на случајот.
Од Министерството за внатрешни работи засега нема официјална информација за причините за приведувањето.