Миланската полиција откри синџир за проституција организиран од агенција за бизнис ескорт, чии клиенти биле познати фудбалери.
Во акцијата се запленети 1,2 милиони евра, објавија денес италијанските медиуми.
Како дел од операцијата спроведена од Финансиската полиција на Милано, во координација со канцеларијата на јавниот обвинител, на четири лица им е одреден куќен притвор поради нивната улога во организирање проституција и перење пари стекнати на тој начин, објави „Милан Тудеј“.
Како што е наведено, на хартија станува збор за агенција за планирање настани, која во пракса, всушност, регрутирала жени за деловни ескорт дами, а во некои случаи тие обезбедувале сексуални услуги во замена за многу големи суми пари.
Сето ова било организирано за богати клиенти, вклучувајќи и некои фудбалери во првата италијанска лига – Серија А, иако ниту еден од нив не е под истрага, според миланскиот весник.
За време на истрагата, како што е објаснето во изјавата на обвинителот, собрани се обемни докази за начинот на кој дејствувале четворицата осомничени, кои работеле заедно со други лица вклучени во нелегални активности.
Припадниците на полицијата во акција го заплениле приходот стекнат на овој начин во вредност од над 1,2 милиони евра.
Според обвинителството, осомничените оствариле приход кој бил целосно непропорционален на нивните даночни пријави, а кој речиси исклучиво може да се припише на профитот на агенцијата за ескорт дами.