Изрелската полиција уби две мали палестински деца и нивните родители на окупираниот Западен Брег. Четиричленото семејство, кое се враќало од пазарување за време на Рамазан, било застрелано во главата и лицето, објавува „Гардијан“.
Петгодишниот Мохамед, седумгодишниот Отман, кој бил слеп и имал посебни потреби, и нивните родители, 35-годишната Ваад Бани Одех и 37-годишниот Али Бани Одех, биле убиени. Семејството се движело низ нивниот град Тамун доцна вчера кога израелските сили отвориле оган врз нивното возило.
Убиствата се случиле само неколку часа откако израелските доселеници во Кусра, јужно од Наблус, го убиле 28-годишниот Амир Моатасем Одех. Неговиот татко, Моатасем Авда, бил избоден со нож и однесен во болница во критична состојба. Насилството од страна на израелските сили и доселениците врз палестинските цивили на окупираниот Западен Брег е во пораст од крајот на февруари, кога Израел и САД започнаа војна против Иран.
Во изминатите две недели, израелските доселеници убија шест цивили за време на нападите врз палестинските села, додека еден човек почина од вдишување солзавец што го користела израелската армија. Убиството на семејството Бани Одех го зголемува вкупниот број на убиени Палестинци на 11.
Двајца браќа го преживеаа пукањето. Најстариот, 11-годишниот Халед, рече дека ја слушнал мајка си како плаче и татко си како се моли кратко пред да умрат.
Еден од полицајците рекол: „Ги убивме кучињата“, изјавил тој за Ројтерс. Зборувајќи од болницата, Халед рекол дека израелските полицајци го прашале по нападот кој бил во автомобилот. „Реков: „Татко ми, мајка ми, тројца браќа и јас“. Му рекле: „Лажеш“, а потоа почнале да го удираат со раце и нозе“, рекло момчето.
Според соопштението на палестинското Министерство за здравство, сите четири жртви биле застрелани во главата и лицето, а возачот, Али Бани Одех, бил исто така застрелан во градите и левата рака. Палестинската Црвена полумесечина објави дека израелските сили првично ги спречиле службите за итни случаи да стигнат до местото на настанот. Според сведоштва на очевидци и снимки од социјалните медиуми, војската подоцна го одвела автомобилот на семејството. Портпарол на израелската полиција изјави дека семејството е убиено за време на заедничка операција со војската.
Во соопштението се вели дека силите отвориле оган врз возилото бидејќи „забележале непосредна закана“ откако автомобилот забрзал. Се вели дека полицијата и армијата се во областа за да „уапсат барани осомничени за кои се верува дека се вклучени во терористички активности“. Додадено е дека „властите ги истражуваат околностите на инцидентот“.
На прашањето каква закана претставуваат децата и нивните невооружени родители и дали пукањето било во согласност со правилата за употреба на сила, полицијата и армијата одбија да коментираат. Портпаролот на израелската армија, која има командна одговорност за сите сили на окупираните палестински територии, рече дека Граничната полиција е одговорна за убиствата и упати дополнителни прашања до полицијата.