Во досиејата на Епстин, меѓу десетици илјади длабоко вознемирувачки фотографии, снимки и е-пошта, има еден застрашувачки е-мејл: „Ми се допаѓа видеото со тортура“. Името на примателот на пораката, испратена од педофилот Џефри Епстин, првично беше скриено од Министерството за правда на САД (DOJ) кога објави три милиони документи на 30 јануари. Сега е откриено дека тој е еден од најмоќните бизнисмени на Блискиот Исток, пишува Телеграф.
Султан Ахмед бин Сулајем, претседател и извршен директор на DP World, кој поседува огромна глобална мрежа на пристаништа и компании за превоз и логистика, е еден од „шесте богати, моќни мажи“ чии имиња првично беа затемнети, но беа откриени во вторник.
Неговиот идентитет беше откриен во Претставничкиот дом од демократот Ро Кана, кој беше еден од застапниците на објавувањето на документите. Членовите на Конгресот таму се законски заштитени од тужби за клевета.
Министерството за правда во понеделникot првпат ги стави на располагање нецензурираните досиеја на Епстин на пратениците, давајќи им шанса на Кана и републиканецот Томас Маси да ги идентификуваат мажите чии имиња беа сокриени. Кана рече дека одделот ги криел нивните имиња „без очигледна причина“.
Името на Султан бин Сулајем често се појавува во документите, заедно со фотографии од него и Епстин, со кои разменувал е-пошта повеќе од една деценија откако Епстин бил затворен во 2008 година. Во април 2009 година, додека сè уште отслужувал 18-месечна казна во затворот во Палм Бич, но бил на работно отсуство, Епстин му испратил е-пошта на Бин Сулајем.
„Каде си? Дали си добро, ми се допаѓа видеото со тортурата“, напишал тој. Друга колекција е-пошта добиена од Блумберг открила преписка од 2007 година во која Бин Сулајем му пишувал на Епстин за неговите обиди да се сретне со супермодел. „Таа ми раскажа смешна приказна“, му пишал Епстин на Бин Сулајем во ноември 2007 година. „Да“, одговорил Бин Сулајем.
„По неколку обиди во текот на неколку месеци, успеавме да се сретнеме во Њујорк. Имаше недоразбирање, таа сакаше некаква работа! додека јас само сакав малку секс!“ Епстин одговорил: „Фала му на Бога, сè уште има луѓе како тебе“.
Во писмо кое е дел од досието, Епстин рекол дека го познава Бин Сулајем од 2002 година и го опишал како „близок личен пријател“. „Султан Бин Сулајем има нето вредност поголема од 100 милиони долари.
Го познавам повеќе од осум години и лично ќе гарантирам за него и за сите информации што ги дава во врска со ова барање“, напишал Епстин во 2010 година, очигледно во препорака за обидот на Бин Сулајем да изнајми неименуван имот. Дури и по осудата на Епстин во 2008 година, Бин Сулајем продолжил да се допишува.
Во 2015 година, тој ја опишал една средба со Епстин како „најдобриот секс што некогаш сум го имал“. Подоцна, очигледно помогнал да се договори руска масерка од „приватниот спа центар“ на Епстин да добие работа како практикант во хотел со пет ѕвездички во Турција за да може „да стекне повеќе искуство“, напишал тој во 2017 година.
Роден во моќно емиратско семејство, Бин Сулајем станал една од највлијателните личности во регионот. Неговиот татко бил советник на кралското семејство во Дубаи, а неговиот брат е претседател на управното тело на Формула 1. Откако тој ја презеде функцијата во 2007 година, DP World стана еден од најголемите оператори на пристаништа во светот.
DP World е сопственик и на британската бродска компанија P&O Ferries, која отпушти 800 морнари во 2022 година со само 30 минути претходно известување. Потегот беше критикуван од конзервативната влада во тоа време, а министерот за транспорт Грант Шапс го опиша како „срамен“.
Во 2008 година, бин Сулајем беше фотографиран со Доналд Трамп на отворањето на неговиот хотел во Дубаи. Биографот Мајкл Волф, кој разговараше со Епстин повеќе од 100 часа пред неговата смрт, претходно рече дека Трамп и Епстин делат „трајна опсесија“ со следење на супермодели.
Меѓу другите имиња што Кана ги откри во вторникот беше малопродажниот магнат и милијардер Лес Векснер, чии врски со Епстин веќе се опширно документирани. Ниту Векснер ниту Бин Сулајем не се обвинети за незаконски дејствија или осудени за какви било злосторства поврзани со Епстин.
Кана сугерираше дека веројатно има повеќе имиња во документите што треба да бидат објавени. „Ако ги пронајдеме шесте мажи што ги криеја за два часа, замислете уште колку кријат во тие три милиони документи“, рече тој.
Тој истакна дека ФБИ ги исчистило досиејата пред да ги предаде на Министерството за правда, вклучувајќи ги и оние „што ги наведуваат имињата на богати и моќни мажи што отишле на островот на Епстин, на неговиот ранч, во неговиот дом и силувале и злоупотребувале малолетни девојчиња“. „Сите се скриени“, рече Кана. „Се поставува фундаменталното прашање: ‘Кого штитат?’“ DP World беше контактиран за коментар.