Соборениот венецуелски лидер Николас Мадуро и неговата сопруга Силија Флорес се зад ѕидовите на озлогласен притворски центар во Бруклин. Како што пишува „Си-ен-ен“, центарот во Њујорк е познат по лошите услови, честите прекини на струја и хроничниот недостиг од персонал.
Сојузниот затворски консултант Сем Менгел без задршка ја опиша состојбата во установата.
– Тоа е навистина пекол. Климатизацијата е лоша, греењето исто така. Секој затвореник добива по едно волнено ќебе. Се спие на многу тенка комбинација од душек и перница со дебелина од околу пет сантиметри, поставени на метална плоча – изјави Менгел.
Според проценките на експертите, Мадуро и Флорес се сместени во одвоени ќелии и изолирани од општата затворска популација.
– Во неговиот случај, станува збор за сериозен безбедносен ризик во општата популација – објасни Менгел.
– Никој не знае како би реагирале другите затвореници – припадници на банди или картели – така што неговото вклучување во општата популација во кој било момент би претставувало огромен безбедносен ризик за установата – додаде тој.
Станува збор за притворски центар чии услови адвокатите и затворениците без задршка ги опишуваат како „одвратни“ и „ужасувачки“.
На првото појавување пред судот на Менхетн, во понеделникот на 5 јануари, Мадуро и Флорес се изјаснија дека не се виновни по обвиненијата за трговија со дрога и оружје.