Седницата на Советот на јавните обвинители, на која требаше да биде назначен вршител на функцијата државен јавен обвинител, е одложена поради отсуство на еден од членовите. Одлуката беше единствена точка на дневниот ред, а седницата е презакажана за понеделник.
До одложувањето дојде откако досегашниот државен јавен обвинител Љупчо Коцевски поднесе неотповиклива оставка на функцијата.
Согласно Законот за Јавното обвинителство, вршителот на должноста државен јавен обвинител се избира од редот на обвинителите во Јавното обвинителство на Република Македонија. Избраниот ќе ја извршува функцијата до избор на нов државен јавен обвинител, но не подолго од шест месеци.
Во меѓувреме, Собранието сè уште не ја започнало постапката за избор на нов државен јавен обвинител.
Коцевски оставката ја соопшти непосредно пред собраниската седница на која требаше да се расправа за негово разрешување, наведувајќи дека се повлекува поради политички притисоци и недоволна поддршка за работата на Јавното обвинителство.