Обединетата и координирана позиција на ЕУ е клучна за обезбедување добар исход од разговорите за завршување на војната во Украина, изјави денес претседателот на Европскиот совет, Антонио Кошта.
Кошта во објава на Платформа X изјави дека разговарал со украинскиот претседател Володимир Зеленски пред неформалниот состанок на лидерите на ЕУ за мировните напори во Украина за да ја добие неговата проценка за ситуацијата, објави Ројтерс.
– Обединетата и координирана позиција на ЕУ е клучна за обезбедување добар исход од мировните разговори- за Украина и за Европа, рече Кошта.
Вчера во Женева се одржаа преговори меѓу делегациите на САД и Украина за мировниот план на САД од 28 точки, за време на кои Украина ги презентираше своите ставови и забелешки.
Државниот секретар на САД, Марко Рубио, по завршувањето на разговорите со украинската делегација изјави дека е постигнат огромен напредок во преговорите за завршување на војната во Украина, додека шефот на украинската делегација, Андриј Јермак, оцени дека состанокот со американската делегација бил продуктивен.