Кандидатот на Националната алијанса за интеграција за општина Чаир, Бујар Османи, денес го претстави својот концепт за почист Чаир. „Формирање на ново комунално претпријатие ‘За чист Чаир’“, рече Османи, обврзувајќи се на вработување на 120 хигиеничари, со јасен и контролиран систем на работа, се вели во соопштението од ДУИ, кое МИА го пренесува интегрално.
„Валкана општина е огледало на општина што не ги почитува сопствените граѓани. Затоа, денес излегувам со ветување дека од првиот ден ќе формираме посебно претпријатие за чистење на општината, со вработување 120 униформирани хигиеничари, врз основа на јасно дефиниран дневен план, при што Чаир ќе биде поделен на реони и кога луѓето наутро излегуваат од своите домови, првото што ќе го видат ќе бидат токму комуналните работници како го чистат Чаир“, изјави Османи.
Османи беше дециден дека Чаир не смее да остане најзагадената и највалканата општина во Скопје. „Ниту едно дете не треба да игра во паркови преполни со отпадоци, ниту една мајка не треба да го носи своето дете по улици натрупани со ѓубре. Доста беше со импровизации и партиски вработувања“, рече тој на денешната прес-конференција.
Османи се обврза прашањето за чистотата во Чаир да го издигне во општонародно движење.
„Да ги интегрираме граѓаните во тоа движење, ангажирајќи ги училиштата, организациите и месните заедници за да спроведуваат волонтерски акции за чистење. Сакам чистотата во Чаир да стане приоритет веднаш по училиштата, а граѓаните да станат дел од напорот Чаир да се ослободи од етикетата дека е највалкана општина во Скопје, нешто што нè загрижува и нè засрамува сите.“
Хигиената, како што нагласи тој, не е само естетика, таа е прашање на здравје и почит кон граѓаните. „Ветувам: оваа слика ќе се промени“, подвлече Османи, додавајќи дека ќе се воспостави редовна анализа на квалитетот на услугата, заснована на реакциите на граѓаните и континуиран мониторинг на терен.
Кандидатот за градоначалник на Чаир, Бујар Османи, во своето обраќање до јавноста истакна дека во општината се крева ново движење, движење на отпорот и достоинството, кое, како што рече, е поголемо од било која изборна кампања.
„Сакам јасно да кажам: на 19 октомври народот на Чаир ќе излезе масовно и ќе го порази системот за купување на волјата на граѓаните, никој не може да го обезвредни нивниот глас ако луѓето масовно излезат и ја изразат својата волја. Никој! Ова не се обични избори. Ова е отпор и започнува движење за нов Чаир,“ изјави Османи.
„Сметам дека она што се случува во Чаир е поголемо од изборна кампања. Изборите во Чаир се историски. Се буди енергија на отпор. Отпор кон начинот на управување. Кон корупцијата. Кон уцените. Кон клиентелизмот. Она што го гледам овие денови е мотивација за мене. Ни се придружуваат луѓе кои не се од ниту една партија: наставници, активисти, занаетчии… кои сами доаѓаат и велат: ова е историска шанса да го ослободиме Чаир,“ изјави Османи.
Тој потенцираше дека во Чаир веќе се формира движење што има за цел да врати достоинство и ред, со јасна порака дека „Чаир не е приватна сопственост на никого, ниту пак рудник за дијаманти“.
„Се буди движење за достоинство. Движење на отпорот за нов, чист Чаир, со модерни училишта и безбедни улици. Движење што ќе докаже дека Чаир не е приватна сопственост на никого. Мојата улога е само да бидам глас на таа енергија, институционално да ја канализирам. Победата не е моја, победата е на сите граѓани на Чаир, кои ќе се кренат и ќе кажат: доста е,“ порача Османи.