Пентагон распоредува околу 800 војници од Националната гарда во Вашингтон за да помогнат во борбата против криминалот, се вели на веб-страницата на Пентагон.
„Околу 800 војници (од Националната гарда) беа повикани денес како дел од работната група „Прекрасен и безбеден Вашингтон“, при што приближно 100-200 од нив обезбедуваат поддршка на агенциите за спроведување на законот. Должностите на овој персонал вклучуваат административни и логистички улоги, како и физичко присуство во поддршка на спроведувањето на законот“, се вели во соопштението.
Наредбата е во сила до 25 септември, освен ако во меѓувреме не е поинаку наредено.
Националната гарда ќе игра улога во напорите Вашингтон да стане еден од најбезбедните, најчистите и најубавите градови во светот, изјави министерот за одбрана Пит Хегсет откако претседателот издаде меморандум за мобилизација на Националната гарда на Вашингтон.
Хегсет рече дека мобилизацијата ќе ја води секретарот на армијата Ден Дрискол, а членовите на гардата ќе бидат распоредени на улиците на Вашингтон следната недела. Тој додаде дека и други единици на гардата се подготвени да учествуваат.