Фудбалерите на Наполи станаа шампиони на Италија. Екипата на Антонио Конте влезе во последното, 38-мо коло од Серија А со еден бод предност пред Интер ја одбрани таа предност со победа од 2-0 против Каљари. Стрелци за победата и четвртото Скудето беа Скот Мектоминај и Ромелу Лукаку.
Интер исто така славеше вечерва, бидејќи победи со 2-0 на гости против Комо, но тоа не беше доволно за да ја одбрани титулата во италијанското првенство. Стефан де Вриј и Хоакин Кореја ги постигнаа головите за финалистите од Лигата на шампионите.
Наполи доминираше од самиот почеток на натпреварот, додека Каљари практично не постоеше на теренот во текот на првите 45 минути. Во почетните минути, голманот на гостите, Ален Шери, се истакна со своите одбрани против Били Гилмур и Амир Рахмани, додека дефанзивците пред него забележаа серија блокирани удари.
Тој го држеше Каљари на „нула“ до 42-та минута, а потоа Матео Политано му ја додаде топката во шеснаесетникот на Скот Мектоминај, кој реагираше брилијантно и го совлада голманот на Каљари со полуволеј. Тој гол им донесе големо олеснување на играчите и навивачите на Наполи, кои веќе почнаа да го чувствуваат историскиот успех.
Вториот гол дојде на самиот почеток од второто полувреме, во 51-та минута. Амир Рахмани со долга топка го пронајде Ромелу Лукаку, кој покажа зошто е доведен во Наполи. Лукаку направи моќен удар во шеснаесетникот, го надмудри дефанзивецот и со прецизен удар го погоди долниот агол од голот. По тој гол, прославата на трибините стана уште погласна, а играчите на Наполи рутински го приведоа натпреварот до крај.