Менаџерот на Арсенал, Микел Артета изјави дека е горд на своите играчи откако лондонскиот фудбалски клуб се пласираше во полуфиналето на Лигата на шампионите.
Фудбалерите на Арсенал го совладаа Реал Мадрид со 2-1 во реваншот од четвртфиналето на Лигата на шампионите во средата во Мадрид. Лондонскиот клуб се пласираше во полуфиналето на Лигата на шампионите, откако го доби првиот натпревар со 3-0.
„Многу сум среќен, мислам дека тоа е трет пат во нашата историја, па морам да бидам многу горд што сум повторно таму. Тимот покажа извонредна амбиција, храброст и желба да се натпреварува со секој противник. Не е само тоа што сме тука, туку и начинот на кој го направивме тоа, и во Лондон и во Мадрид, па затоа сум многу горд на лондонскиот клуб“, рече Артета.