Собраниската Комисија за политички систем и односи меѓу заедниците на денешната седница констатира дека предлог-законите за изменување и дополнување на Законот за вештачење и на Законот за парнична постапка и двата во прво читање, се прифатливи и треба да се дадат на натамошно читање.
Заменик-министерот за правда Билјана Бришкоска-Бошковски образложи дека Предлог-законот за изменување и дополнување на Законот за вештачење има за цел зголемување на квалитетот на дејноста вештачење.
– Се воведува нов концепт на полагање на стручниот испит за вештак, по електронски пат. Со тоа се обезбедува поголема транспарентност во спроведување на испитот, рече Бришкоска-Бошковски. Информира дека овој испит ќе се спроведува најмалку двапати годишно, а кандидатите ќе полагаат испит кој се состои од два дела, теоретски и практичен.
Пратеничката Ана Павловска-Данева од СДСМ рече дека се против носењето на измените на Законот за вештачење. Според неа, се фаворизира и се дава приоритет да настапува само еден орган, Бирото за вештачење наспроти останатите лиценцирани вештаци.
Пратеничката Весна Бендевска од СДСМ истакна дека се работи за класичен случај на дискриминација и оти затоа се против измените на Законот за вештачење.
Бришкоска-Бошковски информира дека донесувањето на измените и дополнувањата на Законот за парничната постапка произлегува од потребата за натамошно унапредување на законските решенија со кои, како што рече, се уредува парничната постапка, а заради зајакнување на правата на странките и нивните законски застапници или полномошници, како и поттикнување и развој на медијацијата во Република Македонија.
– Предложените измени и дополнувања на Законот за парничната постапка се во правец на подобрување на бизнис климата во Република Македонија преку зајакнување на законските механизми за остварувањето и заштитата на правата во парничната постапка, рече Бришкоска-Бошковски.
Пратеничката Павловска-Данева потенцира дека ова е важен закон и оти СДСМ е против тоа во иднина да се менуваат одредбите од овој закон.
– Со измените на Законот за парнична постапка се прави обид да се премине преку два-три члена и да се воведе англосаксонски систем на дејствување во парничната постапка. Ако Министерството за правда утврдило дека овој систем е подобар, бараме да се смени целиот концепт, рече Павловска-Данева.
Таа смета дека парцијалното менување на овој закон е лош за судството и за граѓаните кои доаѓаат пред суд.