Изборот на наднаслов и наслов на денешниот текст објавен во весникот „Дневник“ НОВ СКАНДАЛ НА СДСМ „ЗАЕВ СЕ ПАЗАРЕЛ СО СУДОТ ЗА ПРИТВОРОТ НА ШИПОВИЌ“ од авторите Лепа Ѓорѓиевска и Катерина Нешкова, е пример за непрофесионализам и тенденциозност, реагираат од СДСМ.
Не може поинаку да се протолкува ваквото однесување на весникот „Дневник“ затоа што никаде во текстот не се посочени аргументи што ќе го потврдат насловот на овој текст.
По се изгледа дека уредништвото на весникот го наметнало овој наслов за да и се нанесе штета на СДСМ и тенденциозно да се обидат да влијаат врз перцепцијата на јавноста со извртување на фактите и вистината.
Единствено нешто што Претседателот на СДСМ, Зоран Заев му предочил на Судот е дека солидарно го нуди својот имот и имотите на другите членови од раководството на партијата за да се дозволи Шиповиќ да се брани од слобода.
Ова впрочем е содржано и во самиот текст, дополнето со изјавата на Претседателот Заев:
„Не сакаме амнестија за Шиповиќ, апсолутно судот е растоварен од какви било предрасуди да работи. Бараме правичност и правда за секој од притворените и за секој осомничен досега и во иднина – изјави Заев.“
Заклучокот е едноставен, текстот на „Дневник“ го демантира насловот на „Дневник“.
Основна причина зошто Европската комисија воведе нов „бенч марк“ кој говори за потребата од медиумска култура и за почитување на новинарските стандарди е тенденциозно и непрофесионално однесување на одредени медиуми во Република Македонија.