„Светиот завет“ е најновата книга на охриѓанецот Томислав Тунтев што синоќа беше прмовирана во Охрид.
Книгата, според рецензентите Владо Жура, Милчо Јованоски, Стојан Савески и Горан Михајловски, се обидува да даде одговор на многу непоставени и досега неодговорени прашања поврзани со охридското битие низ вековите, како и за многу други неверојатни и зачудувачки сознанија и податоци кои ретко можат да се најдат низ светските историски книги и преданија.
„Светиот завет“, како што рече Жура, е книга која авторот ја напишал поради неизмерната љубов кон својот роден град, но и со желба да остави завет на идните поколенија, како треба да се сака и штити градот.
– Да проучиш стотици и илјадници страници, да ги одбереш најкарактеристичните настани и да ги преточиш преку една цела галерија непристрасно прикажани ликови – од великодостојници, па се до обични внатрешни душевни превирања, немири и грижи, предизвикани од товарот што им го наметнало времето во еден период од живеачката на нашиот Охрид, претставува сведоштво за нескротлива енергија, голема ерудиција, а воедно и негова почит кон сожителите, рече Жура.
Најновото дело на Тунтев, како што истакна Јованоски, освојува на јуриш и буди желба читајќи го одново да се открие историјата на Охрид. Тој, додаде рецезентот, вешто го прераскажал минатото на градот, небегајќи од фактите и создал роман кој содржи хронолошки и естетски стил.
– Во романот се опишани мааните и доблестите, небиднините и судбините, тагите и радостите, ветропирите и берокуќните, непромисливите и визионерите-охриѓаните кои се раѓале, живееле и умирале со помислата за нераскинливата енергија што ги воздигнала во нивниот Охрид. Оваа книга не тера да им се вратиме на изгубените човечки вредности, кои Охрид ќе го поведат далеку понапред од што е, нагласи Јованоски.
Савески пак појасни дека јасно скицираните живтни патешествија во книгата се плетат околу доминантната тема, битисувањето на „Редот на витезите“, чие основно гесло не згаснало ни денес.
– Доследно почитувајќи го духовното завештение на основачот на Редот, авторот не води низ древниот град, во временски распон од над илјада години, притоа запознавајќи не со низа маркантни фигури кои секој на свој начин оставиле длабоки белези врз вечниот Охрид, рече Савески.
Рецезентот Горан Михајловски забележа дека авторот од љубовта кон Охрид создал мит и го артикулирал како завет.
– Љубовта кон градот е заветот што тој го драматизира и од тоа успева да направи приказна, која на моменти се чини дека е роман, а на моменти историско истражување. Таа мешавина на мистиката и реалноста е направена со чувство и непретенциозно. Токму затоа, оваа убаво искомбинирана фикција со историски факти станала читлива приказна. За тие што го познаваат Охрид, овој роман доаѓа како освежување, а за тие што не го знаат е вистинско откритие, рече Михајловски.
Авторот Тунтев заклучи дека охриѓани докажале оти знаат да бидат многу славни, способни и значајни, не само за историјата на нивниот град, туку генерално за историјата на Македонија и пошироко.
– Охриѓани покажале низ историјата дека знаат да се справат со многу сериозни ситуации и најважно, да го зачуваат и заштитат Охрид од многу зла, небиднини и лоши работи. Не попусто охриѓани велат дека Свети Климент го чувал отсекогаш и ќе го чува секогаш Охрид, нагласи Тунтев.
Книгата „Светиот завет“ на промоцијата се продаваше по симболична цена, а собраните средства ќе бидат наменети за хуманитарни цели.