Граѓаните на Србија поседуваат околу три милиони парчиња оружје што е на самиот врв на светската листа кога станува збор за вооруженост на населението, изјави денеска инспекторот во одделението за јавен ред и мир на Полициската управа во Белград Иван Цвијовиќ.
Според него, во просек од сто граѓани на Србија, 33 се вооружени со огнено оружје, а од Србите повооружени се само Американците и жителите на Јемен.
„Треба да се има предвид дека кога се во прашање статистичките податоци, дека постојат лица, страсни ловџии, кои имаат по неколку парчиња оружје во своја сопственост“, додаде Цвијовиќ.
Тој тврди дека е чест случај лицето да поседува легално по едно парче оружје, додека другите ги држи непријавено, како и оти вистинска опасност во Србија претставува оружјето кое не е регистрирано.