Холандската полиција неодамна го приведе советникот на руската амбасада во Хаг, Димитриј Бородин, поради сомнеж дека во алкохолизирана состојба ги малтретирал своите деца.
Тоа предизвика дипломатски скандал помеѓу двете држави и предизвика кршење на Бечката конвенција, според која се гарантира дипломатски имунитет.
Според руските медиуми на скандалот поради кој реагираше и рускиот претседател Владимир Путин, барајќи од Холандија извинување, му претходел речиси безначаен сообраќаен инцидент.
Имено една русинка со својот автомобил оштетила четири паркирани возила, одбила медицинска помош, а поради сомнеж дека била под дејство на алкохол и била направена анализа на крвта но кратко време била задржана и во полициската станица.
Кога полицијата дошла на нејзината домашна адреса, вратата им ја отворил нејзиниот сопруг Бородин, за кого вработените во Министерството за внатрешни работи , се посомневале дека е пијан, па одлучиле да го приведат, бидејќи оцениле дека на тој начин неговите деца ќе бидат побезбедни.
И покрај тоа што тој се повикал на дипломатскиот имунитет, сепак ноќта помеѓу 5-ти и 6-ти октомври ја поминал во полициската станица, а потоа изјавил дека така не се постапувало ниту за време на Студената војна.
Официјална Москва веднаш реагирала и побарала извинување од Холандија, чие што Министерство признало дека полицијата направила грешка.
-Се надевам дека холандскиот печат ќе престане да го бламира моето семејство, рече Бородин, додавајќи дека тековната година е прогласена за „година на пријателство“ помеѓу Холандија и Русија.
Елена Георгиевска