Пратеникот Александар Николоски, шеф на македонската делегација во Парламентарното собрание на Совет на Европа, од 6 до 11 октомври, е дел од ад- хок комисијата за мониторинг на денешните претседателски избори во Азербејџан.
Во досегашниот предизборен период, соопшти денеска ВМРО – ДПМНЕ, пратеникот Николоски во рамки на моноторингот оствари средба со позначајните претседателски кандидати, претседателот на Централната изборна комисја, преставници на ОБСЕ/ОДИХР, Европски Парламент и Европска комисија во Азербејџан, претставници на медиумите и граѓанските организации.
За денот на изборите, пратеникот Николоски заедно со шпанскиот пратеник Аугустин Конде, е задолжен за западниот регион на главниот град Баку. По завршувањето на изборите ад-хок комисијата подготвува извештај кој се усвојува на редовна сесија на Парламентарното Собрание на Совет на Европа. Оценките на ПС на Совет на Европа се најобјективни, се подвлекува во соопштението, а со тоа и најрелевантни за оцена на целиот изборен процес, за кој се цели да биде фер, демократски, слободен и транспарентен.
Првичните согледувања за изборниот ден, како и драфт извештајот за изборите ќе бидат презентирани на прес- конференција во Баку на 10 октомври еден ден по завршувањето на изборите, додека финалниот извештај со целокупните материјали се очекува да биде презентиран и усвоен на редовната јануарска сесија на ПС на Советот на Европа.
Инаку, пратеникот Александар Николоски, оваа година беше избран и успешно ја спроведе мисијата за мониторинг на парламентарните избори во Бугарија каде беше задолжен за регионот на главниот град Софија. Ова е првпат во македонската парламентрана историја, стои во соопштението, еден пратеник да биде избран два пати во една година во мониторинг ад-хок мисија на ПС на Совет на Европа за набљудување на избори што говори за довербата која и се дава на вредности на македонската парламентарна демократија.