Издавачката куќа „Или-или“ денеска ќе ја објави книгата „Растроена жена“ на германската писателка Јулија Франк, која во 2007 година ја доби „Германската награда за литература“ за најдобар роман од германското јазично подрачје.
По повод излегувањето на романот, денеска и утре во книжарницата „Или-или“ тој ќе може да се купи промотивно за половина цена.
Се работи за 82. наслов во популарната едиција ПРОаЗА, финансиски поддржан од Европската програма за култура 2007-2013. Преводот од германски на македонски јазик е на Ксенија Чочкова.
„Растроена жена“ го раскажува животот на медицинската сестра Хелене низ три генерации, преку имотниот родителски дом и развратниот живот кај тетката во Берлин во дваесеттите години, па се до времето на нацистите, хаосот и бедата по 1945.
Јулија Франк (Берлин, 1970) студира историја на древна Америка, понова германска книжевност и филозофија.
Во 1997 е објавен нејзиниот прв роман „Новиот готвач“, а потоа следуваа и „Слуги на љубовта“ (1999), „Непријатно слетување. Приказни за допирањето“ (2000).