Директорот на Агенцијата за млади и спорт Александар Пујовски и ректорот на Универзитетот „Св.Кирил и Методиј“, Велимир Стојкоски денеска беа во обиколка на спортската сала која се гради на Комплекс факултети кај Универзитетот „Св.Кирил и Методиј“ – Скопје.
Целта на обиколката беше да се изврши увид во напредокот на изведбата на градежните активности на спортската сала која ја гради Агенцијата за млади и спорт со поддршка на Владата.
– Од увидот кој го направија директорот Пујовски заедно со ректорот Стојкоски се констатираше дека градежните активности се одвиваат според зацртаната динамика на изведба. Спортската сала е предвидена да се изгради за две години и ќе биде од мултифункционален карактер. Салата ќе биде приспособена да се користи за кошарка, одбојка, мал фудбал, тенис, пинг понг, гимнастика, боречки спортови и сите останати дисциплини поврзани со физичкото образование и спортот, соопшти Агенцијата за млади и спорт.
Салата ќе има трибини со капацитет од 1.100 гледачи и поттрибински простор кој ќе биде искористен за фитнес и теретана. По завршувањето со изградбата на спортската сала, Агенцијата за млади и спорт ќе ја предаде на Универзитетот „Св.Кирил и Методиј“ – Скопје со што ќе се реши деценискиот проблем за реализација на настава по спорт и спортски активности на Универзитетот. Покрај тоа, ќе се овозможат услови за развој на универзитетскиот спорт и одржување на универзитетски лиги во горенаведените спортови.