Турција денеска ја укина забраната за носење на исламски шамии од страна на вработените во државните институции.
Мерката е дел од пакетот демократски реформи на премиерот Реџеп Тајип Ердоган, претставен на 30 септември.
– Денеска отстранивме една архаична состојба, што противречеше на духот на Републиката, ова е чекор кон нормализација, изјави Ердоган во обраќање пред парламентарната група на владејачката Партија на правдата и развојот.
Ердоган нагласи дека турската република е република на сите 76 милиони жители на Турција.
– Жените со шамии се рамноправни членови на републиката, исто колку што и тие што не ги носат, изјави Ердоган.
Турската опозиција ја критикуваше мерката, сметајќи дека таа претставува нов симбол кон исламска, а не секуларна Турција, создадена од основачот на републиката Мустафа Кемал Ататурк.