Германските богаташи се побогати од кога било, а на врвот на листата на најимотни се основачот на синџирот супермаркети Алди, објави германскиот магазин Менаџер кој состави листа од 500 најбогати Германци.
– Никогаш претходно богаташите не биле толку богати отколку денес, никогаш претходно немало толку милијардери – дури 135 што е рекорд, наведува магазинот.
Заедничкото богатство на 100-те најимотни германски ммилијардери е зголемено за 5,2 отсто во однос на претходната година – на 336,6 милијарди евра. Претходниот рекорд беше 324,6 милијарди евра во 2008 година пред почетокот на светската економска криза.
Еден од основачите на Алди, Карл Албрехт (93) е „тежок“ 17,8 милијарди евра и најдолго е на листата на богаташи во светот. На листата на Форбс се наоѓа на 18-то место.
На второто место е семејството на Тео Албрехт јуниор и неговиот покоен брат Бертхолд, соосновачи на Алди Норд.
На трето место со 13 милијарди евра е Дитер Шварц, сопственик на ривалските Лидл и Кауфланд. На листата е и основачот на софтверскиот гигант САП, Хасо Платнер со 6,2 милијарди евра, претседателот на компанија за производство на играчки Плејмобил, Хорст Брандштетер со 1,35 милијарди и поранешниот шампион во Формула 1, Михаел Шумахер со 650 милиони евра. Менаџер ја прави листата врз основа на проценки на вредност на капитал, акции и имот во сопствеништво на боогаташот.