Во Домот на АРМ денеска од 9 до 18 часот ќе има крводарителската акција „Јас штотуку спасив живот, а вие?”, која обожавателите на Тоше Проески ја организираат секоја година во чест на својот идол и во сеќавање на неговиот последен концерт.
– Хуманоста не смее да биде наша обврска, хуманоста треба да стане наше задоволство и духовна храна. И овојпат да покажеме дека во Скопје и Македонија живеат граѓани кои на дело ја изразуваат својата хуманост следејќи го примерот на нашиот Тоше, апелираат обожавателите.
За време на акцијата во Домот на АРМ ќе има изложба на уметнички слики со ликот на Тоше од младиот уметник Александар Поповски.
Фан-клубот на Тоше утре ќе го организира петтиот музички хепенинг „Биди и ти дел од ѕвезденото небо на Тоше“, од 19.30 часот на плоштадот „Македонија“.
Ѕвезденото небо се одржува секоја година на 5 октомври во сеќавање на последниот концерт на најголемата македонска музичка ѕвезда, одржан на 5 октомври 2007 година на Градскиот стадион во Скопје. Оваа година е поместен за ден подоцна зашто вечер во центарот на Скопје ќе се одржува манифестацијата „Бела ноќ“.
– Дојдете да ја исполниме неговата желба, секоја година да не има во што поголем број. Заедно да се сеќаваме, пееме и да го славиме животот на нашата најголема музичка легенда Тоше Проески. Тагата никогаш нема да запре, но неговата големина секогаш ќе ги грее нашите срца, соопштија фановите на Тоше.