Претседателката на Европската Комисија Урсула фон дер Лајен денеска го поздрави договорот за 16-тиот пакет санкции на Европската Унија против Русија и рече дека ЕУ е посветена да продолжи да врши притисок врз Кремљ.
– ЕУ уште пожестоко се справува со заобиколувањето (санкциите) со таргетирање на повеќе бродови од флотата во сенка на Путин и воведување нови забрани за увоз и извоз. Ние сме посветени на продолжување на притисокот врз Кремљ, рече Фон дер Лејен.
Договорот за 16-тиот пакет санкции го поздрави и високата претставничка на ЕУ за надворешна политика и безбедност Каја Калас која на социјалната мрежа Х оцени дека ЕУ со построги мерки за заобиколување на санкциите, нови забрани за увоз и извоз и санкции за „флотата во сенка“ на Путин, ја затвора вратата за работата на „руската воена машина“.
„Кремљ нема да ја скрши нашата решителност“, рече Калас.
Амбасадорите на 27-те земји-членки на ЕУ денеска усвоија нов, 16-ти по ред пакет санкции против Русија, кој меѓу другото вклучува забрана за увоз на руски алуминиум во Унијата, објавија дипломати во Брисел.