Трошоците на живот минатиот месец биле поголеми за 0,2 отсто во однос на август 2013, соопшти Државниот завод за статистика.
Порастот е резултат на повисоките индекси на алкохолните пијалоци за 1,2 отсто, рибата за 0,8 проценти, преработките од млеко за 0,7 отсто, преработките од овошје за 0,3, сушеното овошје и свежото месо за 0,2 отсто.
Според ДЗС, пораст на трошоците е забележан и кај лековите и помагалата за 6,4 проценти, авионскиот превоз на патници за 5,2, средствата за образование за 3,3, течните горива и гасот за домаќинствата за 3,1, цврстите горива за 2,7, нафтените деривати за 1,6, облеката, обувките и електричните апарати за домаќинстата за 0,4 и пијалоците во рестораните и хотелите за 0,3 отсто.
Намалување на трошоците на животот е евидентирано кај овошјето за 3,1 отсто, производите од жито за 1,2, зеленчукот за 0,7, преработките од зеленчук за 0,3, преработките од месо, преработките од риба, јајцата и другите прехранбени производи за 0,2 процента, кај туристичките аранжмани за 12,3 отсто, средствата за хигиена за 0,6, услугите за сместување за 0,3, мебелот и садовите и приборот за домаќинствата за 0,2 отсто.
Цените на мало во септември 2013 во споредба со септември 2012 година бележат пораст од 0,7 отсто, а трошоците на животот 1,6 проценти.