„Почна процесот на силната и робусна борба против криминалот и корупцијата со елиминирање на терористичка ќелија, за која постоело основани сомневања дека имаат намера да прават акции спротивни на безбедносната состојба, како и поврзаност со ќелии во регионот“.
Ова меѓу другото денеска го порача премиерот Христијан Мицкоски на прес-конференција во Владата по состанокот со Советот на странски инвеститори.
На прашање за претресот во домот на поранешниот вицепремиер Артан Груби и индициите за вмешаност на екс премиер Димитар Ковачевски во направениот криминал, Мицкоски се огради од коментари.
– Би оставил МВР да излезе со целосни информации, но верувајте многу од случаите, кои се случија во минатото ќе бидат откриени и обелоденети. Зборувам за фатални случаи, убиства. Немам информации бидејќи рано од утрово сум во континуирани состаноци и не успеав да ги исконтактирам од МВР. Од оние информации со кои рапсолагам знам дека постојат основани сомневања за злоупотреби и криминал во Лотарија на Македонија и на поедини високи владини функционери од минатите состави на Владата. Дека има истрага, но за деталите не сум запознаен – рече Мицкоски.
За реакциите на ДУИ дека се реализирала акција против Албанците, Мицкоски нагласи дека сите акции се спроведуваат во координација со нивните партнери.
– Понекогаш се чудам на пораките на ДУИ, делуваат чудни. Една од акциите е против група за која постои основано сомнение дека е вовлечена во криминални активности од највисок степен меѓу кои и убиства. Жртви на тие убиства беа Албанци. Ако треба така да се коментира нивната порака. Не можам повеќе да додадам, бидејќи сепак на крај и за овие луѓе за кои постои основано сомневање за вакви сторени кривични дела постои пресумпција на невиност. Има процес и процесот ќе се докажува – рече Мицкоски.
За тоа дали располага со информации за објавување на поранешни и актуелни функционери на црната листа на САД, Мицкоски не сакаше да коментира.